Предсидатель Покраїнскей влади

Иґор Мирович
021/487-4220
Булевар Михайла Пупина 16
21101 Нови Сад
kabinetpredsednika@vojvodina.gov.rs
www.vojvodina.gov.rs


Експозе предсидателя Покраїнскей влади

На самим початку, жадам подзековац посланїком Посланїцкей ґрупи „Александар Вучич – Сербия победзує“, на одлуки предложиц ме за кандидата за предсидателя новей Покраїнскей влади.

Тиж так, жадам подзековац и предсидательови Скупштини АП Войводини Иштванови Пасторови на конкретним формалним предлогу и на похвалох хтори вигварел при представяню моєй биоґрафиї. Окремну подзековносц виражуєм и представительом посланїцких ґрупох хтори, под час заєднїцких консултацийох, дефиновали главни нариси будуцей покраїнскей политики. Даєдни з посланїцких ґрупох наявели потримовку такей политики, даєдни з нїх виражели жаданє критиковац нову политику и єй цилї у будуцим мандату Покраїнскей влади и буц Покраїнскей влади опозиция.

Жадал бим Вас упознац з главнима елементами плану новей Покраїнскей влади за Войводину, як и з програму роботи влади хтору будзем предводзиц кед же мойому тиму укажеце довириє – и то у дзешец найзначнєйших обласцох хтори по своєй компетенциї, жридлово або зверени, по одредбох Устава, законох и Статута – у дїлокругу роботи того високого дома териториялней автономиї и Покраїнскей влади.

Покраїнска влада будзе запровадзовац нову политику дефиновану з потребу пошвидшаного економского розвою. Прето, политична стабилносц у АП Войводини барз важна, цо мож посцигнуц лєм з ясним и предвидзуюцим моделом єй вкупного положеня.

Инсистуюци на подполним и дошлїдним почитованю Устава Републики Сербиї, водзени зоз жаданьом же би ше и закон о компетенцийох АП Войводини и закон о єй финансованю принєсол цо скорей, як плод диялоґу шицких политичних актерох у Народней скупштини, як и ту у нас у Скупштини АП Войводини, наздаваме ше сотруднїцтву и догварком хтори зме посцигли при приношеню одлуки о новим Статуту АП Войводини, цо представя винїмкови приклад резултатох диялоґу рижних политичних странкох и ґрупох.

Вшелїяк, будземе ше намагац уважовац, почитовац и усоглашовац розлики у становискох и роботи Покраїнскей влади, дошлїдно почитуюци Устав Републики Сербиї, без авантуризма и надрильованя дзеки на гоч яки способ. Институция парламентарного диялоґу у Народней скупштини Републики Сербиї, як и у Скупштини АП Войводини нас приведзе, прешвечени сом, по тирваци модел, у чим нова Покраїнска влада будзе участвовац зоз шицкима своїма капацитетами.

Перши принцип нашей новей политики будзе, значи, ясни рамик подзелєня компетенцийох, хторе засноване на Уставу Републики Сербиї, як и утвердзованє предвидзуюцого моделу финансованя економского розвою, а нє розвою пара-политичней класи. То будзе главна водзаца идея, розуми ше, з полним почитованьом принципох стабилносци и ясних критериюмох при приношеню важних одлукох, хтори очекую гражданки и гражданє хтори жию у Автономней Покраїни Войводини.

Вкупни резултати економиї Републики Сербиї барз охрабрую и наводза на заключенє же зме як єй розвитша часц – виокремююци вецей як петнац општини, чий розвой бул на марґинох политичного и економского дїйствованя – длужни шлїдзиц нови економски мири хтори даваю резултати, алє и з активну политику глєдац модели за швидши економски розвой Войводини, провадзаци, вшелїяк, вкупни економски параметри.

З тим у вязи и други принцип у роботи новей Покраїнскей влади – принцип комплементарносци у приношеню одлукох у економскей сфери, окреме кед слово о стимулацийох и ровномирним реґионалним розвою.

Попри того, мушиме инсистовац на жридлох финансованя хтори превозиду уходзену систему трансферох, при тим ю нє утаргуюци, алє ше намагаюци прейґ додатних жридлох обезпечиц вецей пенєжи за шицки сеґменти и економского и дружтвеного розвою АП Войводини у цалосци. Рахуєме на державни фонди и уж одобрени и оперативни кредити хтори ше находза у структури планованого и очекованого дефициту, потим на средства з буджету шицких уровньох власци и медзинародни фонди, окреме на фонди Европскей униї. Так, сцигуєме и по треци наш принцип – зберанє коло проєктох, додатно прейґ концесийох, приватно-явних партнерствох и приватней инициятиви шицких формох – у транспарентним и законїтим моделу.

Политика зраженя Покраїнскей влади и Влади Републики Сербиї муши остац лєм часц историї їх одношеньох, и нїч вецей и нїґда вецей як тото.

Нова Покраїнска влада найвецей енерґиї уложи до прицагованя домашнїх и странских инвестицийох. То будзе главни оперативни приоритет. Наш успих ше будзе мерац з числом нових фабрикох и числом новозанятих у нїх.

У складзе з тим, жадам обявиц цалей домашнєй и медзинародней явносци же зме порихтани каждому инвеститорови чия инвестиция принєше нови роботни места, дац на розполаганє шицки капацитети покраїнскей администрациї и же зме порихтани обезпечиц шицки файти стимулацийох пре витворенє заєднїцких цильох.

Унапрямиме инвеститорох до тих локалних самоуправох хтори класовани до менєй розвитих, и так ше нам поспиши у тих општинох стимуловац розвой дїловного амбиєнту. Будземе будовац индустрийни и дїловни зони пре ґринфилд инвестициї ище вецей як по тераз и будземе порушовац нєшка заварти капацитети пре цо векше число браунфилд инвестицийох.

Нє занєдзбаме и други, розвитши самоуправи, по нашим штвартим принципе – принципе конкурентносци прейґ ясних економских критериюмох з минималним политичним уплївом при приношеню одлукох хтори маю економски характер.

У наступних штирох рокох нас очекую вельки инфраструктурни инвестициї у Войводини. Шицки плановани инвестициї Покраїнска влада подзелї до штирох вельких ґрупох, и о каждей тей ґрупи – чи вона велька чи мала – буду ше старац окремни проєктни тими.

Перше, то вельки державни инвестициї на териториї Войводини: гайзибанска драга през Войводину – гайзибанска драга Беоґрад – Будапешт, пририхтованє проєктох и початок роботох на вибудови авто-драгох Нови Сад – Рума, Беоґрад – Зренянин, Беоґрад – Вершец – Темишвар. Мушиме буц порихтани за час кед инвестициї на коридорох X и XI буду готови, цо ше очекує у наступних двох до трох рокох. Мушиме конкуровац зоз подполно порихтанима проєктами, з ришенима урбанистичнима планами, законченима маєтковима одношенями. Кед закончиме шицко тото цо у вязи зоз пририхтуюцима условиями за реализацию тих проєктох, годни зме повесц же Покраїнска влада була успишна.

Иснуюци вельки проєкти хтори у цеку, як цо то Жежельов мост и Народни театер у Суботици, будземе мушиц нагло закончиц, реорґанизованши и успишнєйши.

Окремну увагу пошвециме вибудови нового будинку Радио-телевизиї Войводини, бо то найвекши и найважнєйши дружтвени обєкт хтори нє обновени по бомбардованю нашей жеми 1999. року.

Будземе робиц и на реализациї вельких реґионалних инвестицийох: на обиходнїцох коло Нового Саду и Суботици, реконструкциї драгох I и II шора, нових системох за воду за пице и системох за пречисцованє одпаду и одрутних водох.

У трецей катеґориї буду медзиопштински инвестициї, а у штвартей – општински инвестициї хтори дзвигаю общи квалитет живота.

За шицки инвестициї поставиме ясни правила и ясни критериюми. Припадносц ґу политичним странком або ґу гоч якей файти политичней гиєрархиї нє будзе мац превагу у пририхтованю и реализациї тих инвестицийох.

Жадали бизме привреди и привреднїком, особлїво у вше векших и напреднєйших конарох туризма, малим фамелийним подприємством и иснуюцим успишним компанийом, розуми ше, у рамикох своїх компетенцийох, буц и сервис и партнер – ефикасно и по началох дїловних моделох.

Установиме Розвойну аґенцию Войводини з цильом же би стимулациї були явни, предвидзуюци и отримуюци, на основи обєктивного оценьованя и мерадлох и же би були унапрямени по началох економского прибутку, роснуца подприємствох и компанийох, першенствено по критериюмох додатного обезпечованя роботи у иснуюцих компанийох, або у компанийох хтори лєм цо маю отвориц свойо погони у Републики Сербиї и АП Войводини.

У обласци енерґетики, будземе помагац у хаснованю обновююцих ресурсох и жридлох зоз стимулованьом нових технолоґийох. Потерашнї фонд будзе функционовац на нових основох, з новима елементами хтори буду провадзиц финансийну лоґику и твориц и робиц по началох иновацийох и реалного технолоґийного проґресу.

Польопривреда вимага стаємни и континуовани усоглашованя у применьованю мирох медзи централним и нашим покраїнским уровньом. Тото, прешвечени сом, будземе робиц ефикаснєйше як гоч кеди у блїзкей историї, и то пре: ефикасне хаснованє жемового фонду, стимулованє розвою аґробизнису и шицких формох поднїмательства – аж по вельки индустриї преробку, з цильом моцней кооперациї, моцнєня малих фамелийних ґаздовствох, цо будзе єден з найважнєйших приоритетох пре утвердзованє порихтаносци у квалитету, стандарду и катеґориї продуктох и пре очуванє валалу и, особлїво, оставаня младих на валалє у Войводини.

Наводньованє будзе други главни оперативни приоритет. Електрификация хотарох, отримованє беґельох и вкупне наводньованє, буду важни будуци задатки хторим ше муши пошвециц цали состав Покраїнского секретарияту за польпривреду, водопривреду и лєсарство, Явне водопривредне подприємство „Води Войводиниˮ и шицки тоти з хторима будземе бешедовац у Министерстве польопривреди.

Мушиме моцнїц сервиси хтори допомагаю ґаздовством приношиц дїловни одлуки, маюци у оглядзе шицко – од тарґовищних информацийох по защиту шацох.

Войводина ма и локални и реґионални бренди польопривредних продуктох и будуца политика Покраїнскей влади будзе же би их промововала и розвивала.

У обласци реґионалного розвою и медзиреґионалного сотруднїцтва будземе моцнїц нашо капацитети у поглядзе черанки информацийох и координациї локалних канцеларийох за економски розвой, будземе моцнїц капацитети за креированє локалних проєктох и потенциялох и, особлїво, условийох за прицагованє инвестицийох прейґ ИПА фондох и других фондох хтори нам на розполаганю у процесу придружованя ґу Европскей униї.

Модел подрозумює интеґровану систему хтора реґионални и локални аґенциї унапрямує на модел вкупного розвою, хтори по наведзених приоритетох и цильох интеґровани з цилями Фонду „Европски роботи“ и ВИП фонду. Применьованє того моделу подрозумює моцнєнє едукативного потенциялу пре применьованє стандардох Европскей униї, окреме кед слово о пририхтованю проєктох хтори наша велька шанса. Пририхтаме ше и за часц ИПА фондох за рурални розвой, бо то робота хтора нам по динамики придружованя нєпостредно предстої.

Жадам визначиц же сом пред дзешец днями иницировал дацо цо бим нєшка знова сцел предложиц, а то формованє окремного скупштинского одбору за защиту животного штредку и то цо скорей, пре активнєйше участвованє покраїнских посланїкох у роботох и проєктох у обласци очуваня и защити животного штредку. То би бул медзикрок у формованю окремного секретарияту за защиту животного штредку у наступним периодзе. О тим жадам посцигнуц консензус зоз шицкима политичнима странками у Скупштини АП Войводини.

Нова политика у обласци еколоґиї подрозумює и нови приступ – хтори ше снує на концепту циркуларней економиї и на прицагованю донацийох и инвестицийох хтори наменєни животному штредку. Тото Покраїнска влада будзе интензивно применьовац. У тей обласци нє будземе без ясного неґативного становиска кед слово о ґенетично модификованих орґанизмох.

Будземе промововац желєни ришеня – вше и вшадзи дзе то мож, бо то потреба и тенденция у шицких розвитих реґийох Европи ґу хторим стремиме.

Будзем инсистовац на знаню и специялизациї у шицких ресорох, а матична вяза у тим процесу будзе Покраїнски секретарият за високе образованє и наукововиглєдовацку дїялносц хтори потенцияли шицких универзитетох у Войводини и шицких наукових дїячох ма ґенеровац и унапрямиц ґу заєднїцким цильом того плану.

Нєдопущуюци прициски, непотизем, продукция нєзнаня, нєдостаток одвичательносци за напредованє науковцох младших ґенерацийох, нєповязаносц з иновативну привреду и траценє критериюмох и нєдостаток квалитету настави и науки на дзепоєдних нових факултетох.

Знанє и його применьованє у привреди, окреме у сучасних трендох информатичного сектору, винаходзенє нових технолоґийних ришеньох и управяцких концептох муши настац и як резултат нашей заєднїцкей роботи.

У здравстве и социялней защити нас очекує велька робота. Подзелєли зме компетенциї и дїлокруг – нє пре становиско политичних странкох о своїх кадрох, алє пре потребу же бизме дали лєпши и квалитетнєйши одвити на числени нєришени питаня.

Прецо нє маме нови клинїчни центер? Прецо у Войводини маме лєм єдну анґио-салу, а вецей як 45 одсто шицких хоротох ма характер кардио-васкуларних хоротох? Прецо ше стануло з унапредзеньом системи превентивней здравственей защити? Прецо єст лїстини чеканя у шицких здравствених установох?

Одвити на тоти питаня у ствари представяю оперативни план нового покраїнского секретара за здравство и ясне и видлїве помкнуце з того нултого орґанизацийного уровня у системи здравственей защити у Войводини. Маме винїмкових здравствених фаховцох у велїх конарох медицини и їх потенцияли буду, прешвечени сом, вихасновани за даванє одвитох на тоти питаня.

Нова Покраїнска влада по конєц того року и на початку наступного року представи план реконструкциї постояцих и вибудов нових предшколских установох, основних и штреднїх школох и школярских и студенстских домох. Жадаме, вєдно зоз шицкима локалнима самоуправами, участвовац у технїчним осучасньованю настави. Окреме жадаме у обласци образованя на язикох националних меншинох унапредзиц условия и промововац найширши можлїви рамик у хторим ше нашо дзеци, вше и вшадзи, у каждим и найменшим валалє у Войводини, без огляду на финансийни и технїчни чежкосци годни школовац на своїм мацеринским язику.

И у обласци спорта и младежи представиме ясни план за стимулациї у розвою школского спорта, за розвой и вибудов спортскей инфраструктури и то по спортских мерадлох.

У тим моменту вецей як сто основни и штреднї школи у Войводини нє маю физкултурну салу. Прето, у складзе з розполагаюцима финансийнима капацитетами, зробиме шицко же бизме тото число зменшали.

Жадал бим виражиц подзековносц и вершинским спортистом хтори походза з Войводини, а хтори посцигли и ище вше посцигую блїщаци резултати. Прето, вершински спорт нє будземе и нє шмеме занєдзбац, алє источашнє мушиме и моцнїц и афирмовац школски, женски, аматерски, роботнїцки спорт и спорт особох з инвалидитетом.

У обласци култури и явного информованя и одношеньох з вирскима заєднїцами будземе водзиц политику очуваня традиционалних културних вредносцох сербского народу у Войводини и у подполносци помагац и стимуловац пестованє културних традицийох и нашлїдствох националних меншинох у директним сотруднїцтве з националнима совитами. Окремни стимулациї и анґажмани буду у вязи зоз програмами за Матицу сербску, Сербски народни театер, Музей Войводини, Архив Войводини и реґионални културни установи. То будзе часц будуцих активносцох Покраїнскей влади. Окрем того, сучасни културни вирази и тенденциї, потим традиционални фестивали и манифестациї, даєдни з нїх уж як важни фактори локалного економского розвою, буду вше и вшадзи у нашим планє. Тиж, нєзависне, явне и отворене финансованє найзначнєйших медийних продукцийох, по ясних правилох, будзе тото ґу чому будземе стремиц.

На остатку, гоч важносц тих одношеньох наклада же бизме вше и вшадзи бешедовали о тим найвецей и найсердечнєйше, здогаднєм вас на нашу явно декларовану политику у обласци правох националних меншинох – националних заєднїцох, политику хтора представя найзначнєйши фундаментни слуп вкупней политичней стабилносци у Войводини.

Прето, ровноправносц, толеранция, порозуменє и подполна активна и всеоблапна защита меншинских правох, у каждодньовей роботи Покраїнскей влади будзе представяц єй найвиразнєйше существо – єй цело и єй дух.

Од подполней и щирей афирмациї меншинскей самоуправи у обласци образованя, култури, информованя и службеного хаснованя язикох и писмох нїяк и анї по яку цену нє одступиме.

Жадам вас на концу поволац же бисце, насампредз, потримали Войводину, попри шицких розликох у политичних становискох и попри шицких наших розличносцох хтори часц нашого живота, тоту Войводину Мики Антича, Флорики Штефан и Ференца Фегера, Войводину Доситея Обрадовича, Велька Петровича и Михайла Пупина, найлєпшу у нас и медзи нами. За нови крочай досц будзе же бизме єй шицки дали руку, же би кажде хто жиє и роби у Войводини бул кус успишнєйши, активнєйши и лєпши.

Войводина будзе знац же ми – так зєдинєни а розлични – врацаме длуство тим хтори єй духовни и материялни вредносци творели виками.

Контакт

Булевар Михайла Пупина 16
21101 Нови Сад

Автономна Покраїна Войводина
Република Сербия

021/487-40-00
presbiro@gmail.com


© 2019 Покраїнска влада